Irfan Siddiqi
us ne be-kar ye bahrup banaya hua hai
ham ne jaadu ka ik a.ina lagaya hua hai
do jagah rahte hain ham ek to ye shahr-e-malal
ek vo shahr jo ḳhvabon men basaya hua hai
raat aur itni musalsal kisi divane ne
sub.h roki hui hai chand churaya hua hai
ishq se bhi kisi din ma.arka faisal ho jaa.e
us ne muddat se bahut hashr bapaya hua hai
laghzishen kaun sambhale ki mohabbat men yahan
ham ne pahle bhi bahut bojh uThaya hua hai
banu-e-shahr hamen tujh se nadamat hai bahut
ek dil hai jo kisi aur pe aaya hua hai
Leave a Reply