ḳhalq-e-ḳhuda hai shaah ki muḳhbar lagi hui
ḳhamoshiyon ki bhiiḌ hai ghar-ghar lagi hui
sang o sag o sada sabhi pichhe paḌe hue
ik dauḌ si hai ham men barabar lagi hui
sad ehtimam-e-girya bhi aaya na apne kaam
bujhti nahin hai aag si andar lagi hui
aao ki mutma.in karen apne zamir ko
mohar-e-sukut toḌ den lab par lagi hui
lazim hai ehtiyat faqihan-e-sheher ko
har ik nazar hai ab sar-e-mimbar lagi hui
muddat ke ba.ad aa.e to ruThi hui si thi
taḳhti hamare naam ki dar par lagi hui
uḌti rahi kuchh is tarah rusva.iyon ki ḳhaak
jaise ‘shafiq’ baat koi par lagi hui
Leave a Reply