Zakir Khan Zakir
umr guzri hai kamrani se
koi shikva nahin javani se
misl-e-adam hai be-ghari apni
kaun Darta hai be-makani se
yuun musalsal azaab jhela hai
ashk lagne lage hain paani se
ham hi kirdar the kahani ke
ham hi bahar hue kahani se
sach chhupana muhal hai sahab
jhuuT se ya ki lan-tarani se
kya vo pariyan qamar-asir huiin
sunte aa.e the ham jo naani se
zulmaton men bhi hans ke khul jaana
us ne sikha hai rat-rani se
banjh ankhen huiin magar ‘zakir’
ḳhvab aate rahe ravani se
Leave a Reply