Naseem Sahar
buund paani ko mira shahr taras jaata hai
aur badal hai ki dariya pe baras jaata hai
atishin dhuup se milti hai kabhi jis ko numu
vahi pauda kabhi barish se jhulas jaata hai
raah tashkil vo arbab-e-vafa ne ki thi
ab jahan qafila-e-ahl-e-havas jaata hai
ho chuki bu-e-vafa shahr se ruḳhsat kab ki
koi din hai ki phalon men se bhi ras jaata hai
aadmi par vo kaḌa vaqt bhi aata hai ki jab
saans lene pas-e-divar-e-qafas jaata hai
tum bhare shahr men kis Dhang se rahte ho ‘nasim’
goya virane men ja kar koi bas jaata hai
Leave a Reply