Poet
hosh-o-shakeb-o-tab-o-sabr-o-qarar pan.cho
qurban kar chuka huun main tujh pe yaar pan.cho
ik dard-e-hijr se bas ye panch arize hain
be-hoshi be-qarari ghash tap buḳhar pan.cho
mutrib pisar ke gham men bhate hain kis ke dil ko
gori aiman alabba des aur malar pan.cho
iman-o-din-o-mal-o-dil aur naqd-e-jan bhi
main kar chuka huun pyare tujh par nisar pan.cho
gar tu qasam bhi khaa.e jhuTe hain mere pyare
paiman-o-ahd-o-va.ada qaul-o-qarar pan.cho
karte hain qatl-e-alam zalim ye uzv tere
mizhgan-o-chashm-o-abru zulf-o-azar pan.cho
kohsar-o-dasht-o-dariya gulzar-o-bazm-e-ishrat
hain ḳhaar saan nazar men be-ru-e-yar pan.cho
is tarah men ghazal ka likhna hai ghair-mumkin
ai ‘sehr’ koi bandhe go ab hazar pan.cho
Leave a Reply