Aasman Par Hai Dimagh Us Ka KHud-Arai Ke Sath

Poet

asman par hai dimagh us ka ḳhud-ara.i ke saath

maah ko taulega shayad apni ra.ana.i ke saath

sair kar aalam ki ghafil didani hai ye tilism

lutf hai in donon ankhon ka to bina.i ke saath

dil kahin hai jaan kahin hai main kahin ankhen kahin

dosti achchhi nahin mahbub harja.i ke saath

is men zikr-e-yar hai is men ḳhayal-e-yar hai

apni ḳhamoshi bhi ham-palla hai goya.i ke saath

ahd-e-piri men vo aalam naujavani ka kahan

valvale jaate rahe saari tavana.i ke saath

dida-e-ahu kahan vo ankhḌiyan kaali kahan

kya muqabil kijiye shahri ko sahra.i ke saath

dil nahin gurg-e-baghal hai zabt se ḳhuun kar use

kar-e-dushman karte hain ai dost dana.i ke saath

ek bose par gareban-gir ai nadan na ho

teri rusva.i bhi hai ashiq ki rusva.i ke saath

dil to divana hai ‘ahqar’ tu bhi divana na ho

koi sauda.i bana karta hai sauda.i ke saath