dil hai bahr-e-be-karan dil ki umang
chaar mauj chaar su hai chaar rang
mauj-e-avval hai juz-o-kul men muhit
sar-ba-sar kibr-o-mina ka rang-Dhang
hai tasavvur doyami mauj-e-ḳhayal
farsh se ta-arsh jis ki hai tarang
soyami hai aql mahdud-o-salim
mante hain jis ka loha sab dabang
dil ki hai mauj-e-chaharum vahima
dam-ba-dam jis ki anokhi hai umang
chaar dang-e-alam-e-ijad men
chaar maujen hain baham aur ḳhana-jang
jaan ki tahrik se hai sab numud
ḳhvah dil hai ḳhvah hai dil ki umang
hain isi tahrik men aḳhir fana
sham.a ki lau men fana jaise patang
aql ki saiqal se ho jaata hai paak
dil ke a.ine ko jab lagta hai zang
ilm men hai hasti-e-dil be-sabat
jaise ‘sahir’ ab-e-dariya men tarang
Leave a Reply