masala husn-e-takhyyul ka hai na ilham ka hai
ye fasana zara mushkil dil-e-nakam ka hai
rat-din pahron-pahar us ki ada ke charche
ye tamasha bhi mire vaste kis kaam ka hai
muskurane lage har samt mohabbat ke charagh
tere chehre ka tasavvur bhi bade kaam ka hai
suuni suuni thiin jo ankhen vo dobara hans den
nazar aaya hai jo manzar vo usi shaam ka hai
is taalluq ka koi rang na dhalne paaya
tazkira sheron men ab bhi usi gulfam ka hai
le udiin zard havaen mire ghar se khushbu
bam-o-dar kya hain daricha mire kis kaam ka hai
fasl ho jaae to badhti hai khushi se duuri
aap ka qurb ye sach hai bade aram ka hai
Leave a Reply