Shad Azimabadi
jo tang aa kar kisi din dil pe ham kuchh thaan lete hain
sitam dekho ki vo bhi chhutte pahchan lete hain
ba-qadr-e-hausla sahra-e-vahshat chhan lete hain
musafir hain safar ke vaste saman lete hain
khuda chahe to ab ke qatl-gah men mushkil asan ho
tire bimar-e-nahaq maut ka ehsan lete hain
kahin marqad pe jaate hain kahin ghar tak nahin jaate
kisi ko jaan dete hain kisi ki jaan lete hain
kudurat taaki rah jaae sab apne daman-e-tar men
sharab-e-shauq ham piine ke pahle chhan lete hain
hamari shairi zinda hui ai ‘shad’ marne par
ki shaeq naqd-e-jan de de ke ab divan lete hain
Leave a Reply