shikayat se gharaz kya muddaa kya
nahin to dost dushman ka gila kya
na aaya nama-bar ghabra raha huun
nahin maalum kya guzri hua kya
bahut achchhi nihayat khuub guzri
aji afat-zadon ka puchhna kya
na do mujh ko mubarakbad be-sud
buri taqdir valon ka bhala kya
ye kyuun chitvan phiri kyuun aankh badli
bhala main ne qusur aisa kiya kya
kab us kuche men thahregi miri khaak
na hoga koi ehsan-e-hava kya
umiid us se ghalat samjha ye o dil
sitamgar se tamanna-e-vafa kya
badha kar haath len un ko ye mushkil
nasib aise mubarak phir dua kya
na ghabrao aji karvat na badlo
irade hain abhi khatir men kya kya
ye kab tak parsai ashiqon se
mohabbat hai to phir ham se haya kya
jigar paani hai sadmon se lahu dil
mire siine men o zalim raha kya
kiya hota koi ehsan to zalim
karenge shukr tera ham ada kya
nahin mumkin ki tujh ko rahm aae
vo main kya aur meri iltija kya
maaz-allah gar hai naujavani
rahoge umr-bhar tum parsa kya
kahan hai dard dil men jo kaho haae
maza dega hamara majra kya
kise dekha ki bhola aap ko bhi
taajjub hai ye mujh ko ho gaya kya
‘nasim’ aao zara tum bhi suno to
ye charcha ho raha hai ja-ba-ja kya