Ye Aur Baat Ki Ye Sehr Besh-O-Kam Pe Chala

Jafar Tahir

ye aur baat ki ye sehr besh-o-kam pe chala

siyah-rat ka jaadu magar na ham pe chala

udhar se pahle bhi kuchh sarfarosh guzare the

rah-e-talab men nishan-e-qadam qadam pe chala

ye ta.iran-e-chaman ka nasib kya kahiye

vo tiir un ke liye vaqf hai jo kam pe chala

ḳhuda ḳhuda ke ishare pe lauT lauT gaya

taḌap taḌap ke tariq-e-sanam sanam pe chala

kabhi ḳhuda ki parastish kabhi sana-e-butan

rah-e-arab pe kabhi jada-e-ajam pe chala

asir-e-dam na hoga mira dil-e-azad

kisi ka hukm kabhi mauj-e-yam-ba-yam pe chala

tujhe bhi dekh liya ham ne o ḳhuda-e-ajal

ki tera zor chala bhi to ahl-e-gham pe chala

ye naqsh-e-pa hain ki zanjir-e-mauj-e-ḳhun yaaro

ye kaun turfa-javan jada-e-sitam pe chala

lab-o-nigah pe mohren lagi rahin ‘tahir’

kisi ka zor na lekin mire qalam pe chala