Rajendra Nath Rahbar
kya kya saval meri nazar puchhti rahi
lekin vo aankh thi ki barabar jhuki rahi
mele men ye nigah tujhe DhunDti rahi
har mah-jabin se tera pata puchhti rahi
jaate hain na-murad tire astan se ham
ai dost phir milenge agar zindagi rahi
ankhon men tere husn ke jalve base rahe
dil men tire ḳhayal ki basti basi rahi
ik hashr tha ki dil men musalsal bapa raha
ik aag thi ki dil men barabar lagi rahi
main tha kisi ki yaad thi jam-e-sharab tha
ye vo nashist thi jo sahar tak jami rahi
sham-e-vida-e-dost ka aalam na puchhiye
dil ro raha tha lab pe hansi khelti rahi
khul kar mila na jaam hi us ne koi liya
‘rahbar’ mire ḳhulus men shayad kami rahi
Leave a Reply