tum se rukhsat-talab hai mil jaao
koi ab jan-ba-lab hai mil jaao
laut kar ab na aa saken shayad
ye masafat ajab hai mil jaao
dil dhadakte hue bhi darta hai
kitni sunsan shab hai mil jaao
is se pahle nahin hua tha kabhi
dil ka jo haal ab hai mil jaao
khvahishen be-sabab bhi hoti hain
kya kahen kya sabab hai mil jaao
kaun ab aur intizar kare
itni mohlat hi kab hai mil jaao
Leave a Reply