haidar-ali-aatish

Aable Paon Ke Kya Tu Ne Hamare Tode

aable paaon ke kya tu ne hamare tode

khar-e-sahra-e-junun arsh ke taare tode

zaqan o rukh men na jasuson se baaqi rakkhi

samar-e-gul chaman-e-husn ke saare tode

silsila apni giraftari ka kab qata hua

pahni pazeb unhon ne jo utare tode

mast mujh sa bhi koi nashsha ka hoga na haris

pi ke mai jaam ke danton se kinare tode

sharbat-e-vasl hai tanqid ki khatir maujud

tap-e-hijr aa ke badan ko na hamare tode

khatm duzdida nigah par hai tiri tarrari

dil nahin tode ahibba ke pitare tode

aa gaya vo shajar-e-husn nazar jab ham ko

bosa le kar lab-e-shirin ke chuvare tode

ishq be-dard se karne ko kaha tha kis ne

sar ko takra ke na dil dard ke maare tode

kunj-e-uzlat men bithaya hai khuda ne ‘atish’

ab jo tum yaan se hile paaon tumhare tode

More Poems

Leave a Comment