main yuun to ḳhvab ki ta.abir sochta bhi nahin
magar vo shaḳhs mire rat-jagon ka tha bhi nahin
mira nasib vo samjha na baat isharon ki
mira mizaj ki main saaf kah saka bhi nahin
baḌi giran hai miri jaan ye kaifiyat mat puchh
ki in labon pe gila bhi nahin dua bhi nahin
ye zindagi ke ta.aqub men roz ka phirna
agarche is tarah jiine ka hausla bhi nahin
ye be-niyaz tabi.at ye be-ḳhudi ke rang
ham apne aap se ḳhush bhi nahin ḳhafa bhi nahin
us ek shakl ko jis din se kho diya hai ‘asad’
mire dariche se ab chand jhankta bhi nahin
Leave a Reply