har aan nai shaan hai har lamha naya hai
aina-e-ayyam hai ya teri ada hai
rahbar jise hairat se khada dekh raha hai
vo rahrav-e-gum-gashta ka naqsh-e-kaf-e-pa hai
nalon ne ye bulbul ke bada kaam kiya hai
ab atish-e-gul hi se chaman jalne laga hai
ai jan-e-vafa dil ke evaz dard liya hai
kuchh soch samajh kar hi to ye kaam kiya hai
pahron pas-e-divar khada tha so khada hai
divana hai paband-e-rah-e-rasm-o-vafa hai
tanhai men mahsus hua hai mujhe aksar
jaise mire andar se koi bol raha hai
taari hai sukut aaj samundar ki faza par
gahrai men shayad koi tufan utha hai
karta tha jo khamoshi ki talqin hamesha
ham-saya mira khvab men vo chikh raha hai
zindan ke darichon se hai phir shauq ne jhanka
shayad ki junun-khez gulistan ki hava hai
ye gardish-e-ayyam ka ehsan hai ‘tarzi’
ab zakhm-e-kuhan apna hara hone laga hai