usi ke zulm se main halat-e-panah men tha
har ik nafas mira jis shaḳhs ki panah men tha
chamak raha tha vo ḳhurshid-e-do-jahan ki tarah
vo haath jo ki gareban-e-kaj-kulah men tha
ufuq ufuq ko payam-e-sahr diya main ne
mira qayam agarche shab-e-siyah men tha
mahak rahe the nazar men gulab sapnon ke
khuli jo aankh to dekha main qatl-gah men tha
mire harif mujhe raund kar nikal na sake
fasil-e-sang ki surat khaḌa main raah men tha
jo baat baat pe karta tha inqalab ki baat
saji salib to vo hamiyan-e-shah men tha
adu ki fauj ne luuTa to kya sitam ye hai
‘ra.is’-e-shahr bhi shamil isi sipah men tha
Leave a Reply