Bhartendu Harishchandra
ajab jauban hai gul par amad-e-fasl-e-bahari hai
shitab aa saqiya gul-ru ki teri yadgari hai
riha karta hai sayyad-e-sitamgar mausam-e-gul men
asiran-e-qafas lo tum se ab rukhsat hamari hai
kisi pahlu nahin aram aata tere ashiq ko
dil-e-muztar tadapta hai nihayat be-qarari hai
safai dekhte hi dil phadak jaata hai bismil ka
are jallad tere tegh ki kya ab-dari hai
dila ab to firaq-e-yar men ye haal hai apna
ki sar zaanu pe hai aur khun-e-dil ankhon se jaari hai
ilahi khair kiijo kuchh abhi se dil dhadakta hai
suna hai manzil avval ki pahli raat bhari hai
‘rasa’ mahv-e-fasahat dost kya dushman bhi hain saare
zamane men tire tarz-e-sukhan ki yadgari hai
Leave a Reply