chand se apni yaari thi
zulmat bhi ujyali thi
chikh thi dil ke gumbad men
honton par khamoshi thi
ek anokha anubhau tha
ghadi milan ki nyari thi
tuuti kashti patthar ret
samne sukhi naddi thi
din men taare dekhe the
anhoni bhi honi thi
sahil par thi aag hi aag
dariya men tughyani thi
hadd-e-nazar tak sahra tha
sar par dhuup bala ki thi
lafz the sab payab magar
baat nihayat gahri thi
‘abid’ na-mumkin thi jiit
vaqt ki chaal hi aisi thi
Leave a Reply