Jafa Ki Us Se Shikayat Zara Nahin Aati

jafa ki us se shikayat zara nahin aati

vo yaad hi hamen shukr-e-ḳhuda nahin aati

nikal ke ta-ba-lab ah-e-rasa nahin aati

karahta hai jo ab dil sada nahin aati

hamari ḳhaak ki miTTi hai kya ḳharab ai charḳh

kabhi idhar ko udhar ki hava nahin aati

shab-e-visal kahan ḳhvab-e-naz ka mauqa.a

tumhari niind ko aate haya nahin aati

adu hamari ayadat ko le ke aa.e unhen

kahan ye mar rahi ab bhi qaza nahin aati

lahad pe aa.e the do phuul bhi chaḌha jaate

abhi tak aap men bu-e-vafa nahin aati

miri lahad ko vo un ka ye kah kar Thukrana

sada-e-nara-e-sad-marhaba nahin aati

sitam hai aur mire dil-shikan ka ye kahna

shikast-e-shisha-e-dil ki sada nahin aati

‘jalal’ ham ye na manenge tu use nahin yaad

tujhe kabhi koi hichki bhi kya nahin aati