Aziz Lakhnavi
vo nigahen kya kahun kyuun kar rag-e-jan ho ga.iin
dil men nashtar ban ke Dubin aur pinhan ho ga.iin
thiin jo kal tak jalva-afrozi se sham-e-anjuman
aaj vo shaklen charagh-e-zer-e-daman ho ga.iin
ik nazar ghabra ke ki apni taraf us shoḳh ne
hastiyan jab miT ke ajza-e-pareshan ho ga.iin
dam ruka tha jis ki uljhan se mire siine men aah
phir vahi zulfen mire gham men pareshan ho ga.iin
phunk di ik ruuh dekha zor-e-ejaz-e-junun
jitni sansen main ne liin tar-e-gareban ho ga.iin
ishq ke qisse ko ham saada samajhte the magar
jab varaq ulTe to ankhen saḳht hairan ho ga.iin
chand tasviren miri jo muḳhtalif vaqton ki thiin
ba.ad mere zinat-e-divar-e-zindan ho ga.iin
uḌ ke dil ki ḳhaak ke zarre ga.e jis jis taraf
rafta rafta vo zaminen sab bayaban ho ga.iin
aa.ine men aks hai aur aks men jazb-e-ḳhalish
dil men jo fansen chubhin tasvir-e-mizgan ho ga.iin
us ki sham-e-gham pe sadqe ho miri sub.h-e-hayat
jis ke matam men tiri zulfen pareshan ho ga.iin
sham-e-va.ada aa.iye to aap us ki fikr kya
phir bana dunga agar zulfen pareshan ho ga.iin
kis dil-avara ki mayyat ghar se nikli hai ‘aziz’
shahr ki abad rahen aaj viran ho ga.iin
Leave a Reply