Yaad Mujhe Dila Gai Meri Wo Bewafaiyan

Mahmood Shaam

yaad mujhe dila ga.i meri vo bevafa.iyan

aankh men us ki naqsh thiin kitni kaThin juda.iyan

chehre pe kya azaab the aankh men kitne ḳhvab the

honT khuli kitab the kahte the sab kahaniyan

phaili thi us ke as-pas gahri udasiyon ki baas

jhank rahi thi saḳht pyaas dahak rahe the jism-o-jan

palkon pe guzri sa.aten lab par gile shikayaten

ansuon men hikayaten dhaḌkanen saans siskiyan

lafz the kuchh kaTe kaTe saans bhi the baTe baTe

baal the gard men aTe chehre pe thiin hava.iyan

‘sham’ hava ki siskiyan din ke lahu ki surḳhiyan

dard-bhari ye dastan phaili hain sab karan karan