zulmat ba-har-maqam ḳhilaf-e-talab mili
din ka suragh DhunDne valon ko shab mili
ai dost tere husn-e-inayat ki ḳhair ho
ye agahi hamen tire gham ke sabab mili
yad-e-ghazal-ruḳhan bhi ḳhayal-e-ma.ash bhi
asudgi dayar-e-tamanna men kab mili
nikle the tirgi ke musalsal fareb se
jab raushni mili to hamen jan-ba-lab mili
qissa tiri vafa ka sitam rozgar ke
jo shai hamen mili hai vahi muntaḳhab mili
fursat-talab masa.il-e-asr-e-ravan bhi the
lekin tire ḳhayal se fursat hi kab mili
sultan-‘rashk’ ḳhud se shanasa.i ke liye
dekhenge ḳhvab fursat-e-tabir jab mili
Leave a Reply