zinhar us ki phir koi qimat nahin rahi
jis dil men tere gham ki amanat nahin rahi
shayad kisi ne mujh ko faramosh kar diya
agli si ab firaq men lazzat nahin rahi
ya ab nigah-e-naz men vo garmiyan nahin
ya dil ko iztirab ki aadat nahin rahi
vo zindagi abas hai na ho jis men soz-o-saz
us dil pe haif jis men mohabbat nahin rahi
kuchh yuun miTa rahi hai mujhe gardish-e-falak
duniya ko jaise meri zarurat nahin rahi
har lamha un ki yaad rahi monis-e-hayat
har chand un ko mujh se mohabbat nahin rahi
‘talib’ pe ab kisi ki nigah-e-karam nahin
shayad mata-e-ishq ki qimat nahin rahi
Leave a Reply