zindagi ki ravish badal ‘anjum’
vaqt ke saath saath chal ‘anjum’
dekh jo jo hain astinon men
saare sanpon ka sar kuchal ‘anjum’
Thokaren aur kitni kha.ega
girne se peshtar sanbhal ‘anjum’
zindagi ek ret ki divar
bach ke saa.e se bhi nikal ‘anjum’
rone valon ke saath ro lena
jalne valon ke saath jal ‘anjum’
dil ko zindan ka ḳhauf hai kyunkar
ashiyan chhoḌ ab nikal ‘anjum’
kar le raushan charagh-e-husn-e-amal
apne kirdar ko badal ‘anjum’
ghair ke bhuul ja tu naqsh-e-qadam
rasta ḳhud bana tu chal ‘anjum’
Leave a Reply