zindagi ḳhvab-e-hasin ka naam hai
ya koi ḳhush-rang ḳhali jaam hai
zindagi ka kya hasin anjam hai
dil men teri yaad lab par naam hai
hans liya tha lahje par ham ne kabhi
umr bhar ab anso.on se kaam hai
mast hai jis ne bhi dekha ek baar
chashm-e-mai-gun vo chhalakta jaam hai
ye shikayat aur ye ah-o-fughan
tera da.ava-e-mohabbat ḳhaam hai
jis ne paa.i ek bhi teri jhalak
vo sada ḳhamosh hai gumnam hai
ruuh par ik kaif ban kar chha ga.i
yaad se mahki hui jo shaam hai
pyaar ki teri nazar ya qahr ki
aur kya ye gardish-e-ayyam hai
ja-ba-ja ham ḳhud bhaTakte hi phire
varna us ke dar pe faiz-e-am hai
sub.h dekhi hai ‘habib’ aur dopahar
aa.i ab to zindagi ki shaam hai
Leave a Reply