Syed Anjum Jafri
zindagi chhoḌ ga.i be-sar-o-saman mujhe
umr-bhar yaad raha aap ka ehsan mujhe
be-hikayat mire ehsas ki tasvir magar
har zamane ka bana.e koi unvan mujhe
qat.a kar de jo zamane se ta.alluq mera
baḳhsh de is gham-e-hasti ka tu irfan mujhe
log dekhenge tujhe shahr men charcha hoga
ghaur se dekh miri samt na pahchan mujhe
dard ki lahar uThi main ne sambhala dil ko
kar diya hai miri nazron ne pasheman mujhe
na koi naqsh-e-qadam hai na koi gard-e-safar
duur tak raah nazar aa.i hai sunsan mujhe
dil ne phir un se na milne ki qasam khaa.i hai
dekh len vo na kisi vaqt pareshan mujhe
main ne joḌa gham-e-janan se ta.alluq ‘anjum’
jab dikha.i na diya aish ka imkan mujhe
Leave a Reply