tu apne pindar ki ḳhabar le ki ruḳh hava ka badal raha hai
tiri nazar se bahakne vaala fareb kha kar sambhal raha hai
yahi hai dastur-e-shahr-e-hasti ki jo naya hai vahi purana
hayat angḌa.i le rahi hai zamana karvaT badal raha hai
rah-e-talab men junun ne akasr shu.ur ko a.ina dikhaya
jise tha uzr-e-shikasta-pa.i vo ab sitaron pe chal raha hai
hamen ye ta.ane na do ki ham ne zamana-sazi ke gur na sikhe
ki rafta rafta mizaj-e-duniya hamare sanche men Dhal raha hai
tiri adaon ki sadgi men kisi ko mahsus bhi na hoga
abhi qayamat ka ik karishma haya ke daman men pal raha hai
kisi men himmat na thi ki baḌh kar junun ki zanjir thaam leta
ḳhirad ki basti men hai andhera charagh sahra men jal raha hai
hazar sheve the guftugu ke hazar andaz the suḳhan ke
magar ba-ima-e-dil ‘faridi’ fida-e-rang-e-ghazal raha hai
Leave a Reply