Poet
zinda rakhni hai mujhe ijz ke me.aar ki dhun
ek sandesa hai ye hukm se inkar ki dhun
tu palaT aa ki tujhe meri zarurat paḌegi
tujh ko zinda nahin chhoḌegi ye be-kar ki dhun
dost mansur se hoti hui ham tak pahunchi
haq ki avaz pe DaT jaate hue daar ki dhun
aap aate hain chale jaate hain milte hi nahin
dil men rah jaati hai har baar hi iz.har ki dhun
ai ḳhuda izn mile teri taraf aane ka
kitni betab hai ab tere gunahgar ki dhun
shahr chhoḌa hai tire ishq ki vahshat ke sabab
jaane le jaa.e kahan ab dil-e-bimar ki dhun
Leave a Reply