Bashir Farooqi
logo ham chhan chuke ja ke samundar saare
us ne muTThi men chhupa rakkhe hain gauhar saare
zaḳhm-e-dil jaag uThe phir vahi din yaar aa.e
phir tasavvur pe ubhar aa.e vo manzar saare
tishnagi meri ajab ret ka manzar nikli
mere honTon pe hue ḳhushk samundar saare
us ko ghamgin jo paaya to main kuchh kah na saka
bujh ga.e mere dahakte hue tevar saare
agahi karb vafa sabr tamanna ehsas
mere hi siine men utre hain ye ḳhanjar saare
dosto tum ne jo phenke the mire angan men
lag ga.e ghar ki fasilon men vo patthar saare
ḳhun-e-dil aur nahin rang-e-hina aur nahin
ek hi rang men hain shahr ke manzar saare
qatl-gah men ye charaghan hai mire dam se ‘bashir’
mujh ko dekha to chamakne lage ḳhanjar saare
Leave a Reply