Syed Hamid
phuul chehra ansuon se dho ga.e
aa.e the hansne chaman men ro ga.e
dil ye ujḌa hai ki un ki yaad ko
muddaten guzrin zamane ho ga.e
kis liye mahfil men itni barhami
ham chale jaate hain uTh kar lo ga.e
jab chalenge kaTne kal fasl ko
tab khulega aaj kya kya bo ga.e
koi Thahra hai kisi ke vaste
kah rahe the ja.enge ham so ga.e
DhunDte kya gosha-e-maqsud ko
raah ki ranginiyon men kho ga.e
kis liye aa.e the yaan taqdir men
bojh Dhona jism ka tha Dho ga.e
chhoḌna mumkin na tha stage ko
rol apna karte karte so ga.e
tiin sathi ja rahe the saath saath
ek baaqi rah gaya hai do ga.e
kya yahi hai dar-e-fani ki kashish
phir na lauTe us taraf ko jo ga.e
kar raha hai ik jahan jin ka tavaf
but-kade men kis ke darshan ko ga.e
aap azurda hue ‘hamid’ ḳhafa
lijiye donon barabar ho ga.e
Leave a Reply