suragh-e-jada-o-manzil agar nahin milta
hamen kahin se javaz-e-safar nahin milta
likhen bhi dasht-navardi ka kuchh sabab to kya
ba-juz ki qais ko laila ka ghar nahin milta
yahan fasil-e-ana ha.il-e-masiha.i
vahan vo log jinhen charagar nahin milta
hazar kucha-e-nik.hat men Daliye Dere
magar vo phuul sar-e-rahguzar nahin milta
phir abiyari-e-naḳhl-e-suḳhan nahin hoti
dil-e-hazin jo pas-e-chashm-e-tar nahin milta
payam-e-shauq ko giton men Dhaliye kyun-kar
mizaj-e-bad-e-subuk bhi agar nahin milta
chalo ki phir se rafiqon ki bazm suuni hai
chalo ki sang-e-malamat ko sar nahin milta
bashar-ba-nam-e-bashar to bahut hain duniya men
bashar ki ḳhubiyon vaala magar nahin milta
chalo phir us ke jharoke men phuul rakh aa.en
suḳhan koi jo agar mo’atabar nahin milta
jahan men ek tumhi munfarid nahin ‘ahmad’
yahan to koi bhi misl-e-digar nahin milta
Leave a Reply