Sabahat Urooj
zinda ankhon men be-hisi raushan
murda chehron pe tazgi raushan
in nasibon pe roz ho matam
un ki mahfil men raushni raushan
ḳhud men us ko bujha diya main ne
phir hua mujh men aur bhi raushan
bevafa tha magar bichhaḌne par
us ki ankhon men thi nami raushan
adatan sab se baat karti huun
us ki rahti magar kami raushan
us ke chehre se chhan ke aati hai
tab hi lagti hai chandni raushan
yuun hi raushan rahen vo sab chehre
jin ke dam se hai zindagi raushan
Leave a Reply