zehn zinda hai magar apne savalat ke saath
kitne uljhao hain zanjir-e-rivayat ke saath
kaun dekhega yahan din ke ujalon ka sitam
ye sitare to chale ja.enge sab raat ke saath
jaane kis moḌ pe manzil ka pata bhuul ga.e
ham ki chalte hi rahe gardish-e-halat ke saath
vaqt karta hai bhala kis se yahan husn-e-suluk
vo bhi is daur men qanun-e-makafat ke saath
vo to ḳhanjar tha gale jis ne lagaya ham ko
varna pesh aata hai ab kaun mudarat ke saath
hadse hain to unhen pesh bhi aana hai zarur
vo bhi us shoḳh se taqrib-e-mulaqat ke saath
kaun sunta hai yahan dil ki kahani ‘tanvir’
vo bhi ḳhushbuon ke mauhum isharat ke saath
Leave a Reply