Badr Wasti
zehan aur dil men jo rahti hai chubhan khul jaa.e
aa.e kaghaz pe to salma-e-suḳhan khul jaa.e
qatra-e-dida-e-namnak masiha.i kare
fikr ke band darichon ki shikan khul jaa.e
main use roz manata huun sahar hone tak
mere allah kisi shab to ye dulhan khul jaa.e
ek ḳhushbu si hai jo ruuh ki gahra.i men
lafz mil jaa.en to ma.ani ka chaman khul jaa.e
is tarah jaage kisi roz ghazal ka jaadu
jaise masti men piya se koi jogan khul jaa.e
nim-shab ijz-o-samajat se karun dast daraz
lafz dhone ke liye ankhon men savan khul jaa.e
sar-kashi aur tajavuz se bachana yarab
mere ehsas men gar yaas ka phan khul jaa.e
Leave a Reply