zara si der tabi.at bahal rahne de
main yuun hi ḳhush huun mujhe pur-malal rahne de
ḳhabar nahin ki ghalat kya hai aur kya hai durust
dila ye ishq hai to qil-o-qal rahne de
yahan pe harakat-e-ma.akus ka hai daḳhl baḌa
isi liye mujhe vaqf-e-saval rahne de
kise hai zarf-e-tamanna ki vus.aton ki ḳhabar
main hijr maang rahi huun visal rahne de
kisi nashat ke lamhe ko kab hai likhna mujhe
tu aish-e-hijr se mujh ko niDhal rahne de
na kar vazahat-e-tamsil-e-raqs-e-kar-e-junun
mujhe samajhna hai to be-misal rahne de
tu mere ishq ke kuuze ko toḌ de lekin
bas aisa kar ki mire ḳhadd-o-ḳhal rahne de
tu ik payade ko shah-mat dena chahta hai
main haar maan ga.i apni chaal rahne de
Leave a Reply