kabhi to sochna tum un udaas ankhon ka
ye ratjagon men ghiri mahv-e-yas ankhon ka
main ghar gai thi kahin vahshaton ke jangal men
tha ik hujum mire aas paas ankhon ka
barahnagi tire andar kahin panapti hai
libas dhund koi be-libas ankhon ka
tumhare hijr ka mausam hi raas aaya mujhe
yahi tha ek tabiat-shanas ankhon ka
usi ki nazr sabhi ratjage sabhi ninden
aur us ki ankhon ke naam iqtibas ankhon ka
padi rahe tiri tasvir samne yunhi
ye zar khila rahe ankhon ke paas ankhon ka
khayal tha ki vo abr is taraf se guzrega
so ye bhi ‘janan’ tha vahm-o-qayas ankhon ka
Leave a Reply