Poet
zara haTe to vo mehvar se TuuT kar hi rahe
hava ne nocha unhen yuun ki bas bikhar hi rahe
hain be-nishan jo uḌe the bagula-zad ho kar
zamin pe leTne vaale zamin par hi rahe
bahar jhaḌiyon par TuuT TuuT kar barsi
dua.en mangte ashjar be-samar hi rahe
ḳhusha ye saaya o ḳhushbu ki ta.ir-e-ḳhush-rang
na phir ye vaqt rahe aur na ye shajar hi rahe
bana.en aisa makan ab ki chand aur suraj
jidhar bhi jaa.en magar raushni idhar hi rahe
Leave a Reply