Abul Hasanat Haqqi
zamin khatm hui sar par asman na raha
isi ke saath koi khauf-e-imtihan na raha
hamare ishq ka koi gavah zinda nahin
azab-e-hijr tha ab vo bhi darmiyan na raha
tamam-rat sitare hamin ko dekhte the
tilism-e-zat se nikle to ye jahan na raha
fasil-e-shahr pe shab-zinda-dar rahte the
hujum-e-shahr men aisa koi javan na raha
ye zindagi hai to ham zindagi se baaz aae
vo jaan kya ki jahan jaan ka ziyan na raha
tamam lafz hain tafhim-e-nau pe amada
qayamaton se guzarna bhi na-gahan na raha
bas ik saliqa-e-tajsim khvab tha magar ab
sivae sina-e-sad-chak kuchh nishan na raha
miyan-e-gardish-e-aflak tu bhi khush ho ja
malal ham ko bhi ai sai-e-raegan na raha
kharab-o-khasta-o-asudagan-e-manzil bhi
naved-e-jashn ki ‘haqqi’ ka karvan na raha
Leave a Reply