jaise ḳhushbu ko saliqe se saba le jaa.e
koi aise hi mujhe mujh se chhuḌa le jaa.e
marhala-var bikharti hi ga.i huun ḳhud men
ab jidhar chahe hava mujh ko uḌa le jaa.e
jazbiyyat hai baḌi raunaq-e-duniya tujh men
ik ghazal aa.e mujhe sab se bacha le jaa.e
haa.e vo garmi-e-bazar-e-tamanna ki mujhe
har talab ḳhvab ke naake pe biTha le jaa.e
ab vo chehra na ḳhadd-o-ḳhal hain baaqi mere
koi tasvir se sab rang chura le jaa.e
roz aata hai miri ḳhalvat jaan men koi
yaad ki bhiiḌ men chupke se uTha le jaa.e
husn marhun-e-tamasha-e-tamanna us ka
jo ki hathon se mire rang-e-hina le jaa.e
Leave a Reply