Ahmad Shanas
zamana ho gaya hai khvab dekhe
lahu men dard ka shab-tab dekhe
manazir ko bahut muddat hui hai
nigahon men naya ik baab dekhe
sitara shaam ko jab aankh khole
achanak chand ko payab dekhe
vo chingari si de qurbat ki mujh ko
to phir suraj ki ab-o-tab dekhe
kai raten huiin khidki men ghar ki
taalluq ka naya mahtab dekhe
main lafzon ki nai faslen ugaun
vo sannaton ke taaza khvab dekhe
meri ankhon men savan rang bhar de
mujhe ai kaash vo sairab dekhe
na vo avargi ka shauq ‘ahmad’
na koi dasht ko betab dekhe
Leave a Reply