tujh se ik haath kya mila liya hai
shahr ne vaqi.a bana liya hai
ham to ham the ki us pari-ru ne
aa.ine ka bhi dil chura liya hai
varna ye sail-e-ab le jaata
shahr ko aag ne bacha liya hai
aisi naav men kya safar karna
jis ne dariya ko dukh suna liya hai
kuza-gar ne hamari miTTi se
kya banana tha kya bana liya hai
dekhiye pahle kaun marta hai
saanp ne aadmi ko kha liya hai
jaane valon ko ab ijazat hai
ham ne apna diya bujha liya hai
jab koi baat hi nahin ‘ami’
asman sar pe kyuun uTha liya hai
Leave a Reply