Sham Aai to Koi KHush-Badni Yaad Aai

Azm Bahzad

shaam aa.i to koi ḳhush-badni yaad aa.i

mujhe ik shaḳhs ki va.ada-shikni yaad aa.i

mujhe yaad aaya ki ik daur tha sargoshi ka

aaj usi daur ki ik kam-suḳhani yaad aa.i

masnad-e-naghma se ik rang-e-tabassum ubhra

khilkhilati hui ghuncha-dahni yaad aa.i

lab jo yaad aa.e to boson ki ḳhalish jaag uThi

phuul mahke to mujhe be-chamni yaad aa.i

phir tasavvur men chali aa.i mahakti hui shab

aur simTi hui be pairahani yaad aa.i

haan kabhi dil se guzarta tha julus-e-ḳhvahish

aaj usi tarah ki ik nara-zani yaad aa.i

qisa-e-rafta ko dohra to liya ‘azm’ magar

kis masafat pe tumhen be-vatani yaad aa.i