Ye Ghaza Hai Kajal Hai Ubtan Hai Kya Hai

ye ghaza hai kajal hai ubTan hai kya hai

ye rang-e-hina dagh-e-daman hai kya hai

laTak hai maTak hai jhaTak hai ada hai

khaTak hai dhaḌak hai ki dhaḌkan hai kya hai

haya ki baharen hain ra.anaiyon par

ye jalva hai masti hai joban hai kya hai

ye phaili hui ḳhushbuon ki ghaTaen

ye gesu hai kakul hai uljhan hai kya hai

tabassum ki bijli qayamat ki shoḳhi

ye baran hai badal hai kaḌkan hai kya hai

jo saz-e-sitam har taraf baj raha hai

vo paael hai chuḌi hai kangan hai kya hai

ye kaisi jagah hai ki dil kho raha hai

bayaban hai sahra hai gulshan hai kya hai

kahun main kabhu sher aisa to kahiye

shararat hai laghzish hai bhaTkan hai kya hai

junun ka asar ‘ahan’ be-nava par

ye jaadu hai Tona hai bandhan hai kya hai

Leave a Comment