Abul Hasanat Haqqi
zabun-o-khvar hui hai miri jibillat bhi
mire nasib-o-virasat men se imamat bhi
ajab hiras men tha mere mausamon se ghanim
ki de raha tha use bhagne ki mohlat bhi
vo jab bhi aaya kam-o-besh mujh pe vaar gaya
mujhe ye shauq ki laata kabhi zarurat bhi
main apne zahr se vaqif huun vo samajhta nahin
hai mere kisa-e-sad-kam men sharafat bhi
samajh rahe the main tanha huun be-basirat log
pas-e-ghubar chali aa rahi thi khilqat bhi
agar saliqe se koi giraft men laae
main odh leta huun aksar rida-e-tohmat bhi
main niind men tha ki sargoshiyon ke raqs men tha
udhar thi naqa-e-umr-r-ravan ko ujlat bhi
ai shahsavar mujhe badshah bana ke to dekh
main kaat dalunga sar-rishta-e-baghavat bhi
usi ne rakh diya mujh ko samet kar ‘haqqi’
vo jis ke naam se mujh ko mili thi shohrat bhi
Leave a Reply