Shaad Aarfi
zabt-e-navak-e-gham se baat ban to sakti hai
aadmi ki ungli men phans bhi khaTakti hai
kya kisi navazish ki poll khol di main ne
aankh jhenpti kyuun hai kyuun zaban bahakti hai
ham-qafas nasibon se gulsitan ka kya rishta
jis tarah koi Daali TuuT kar laTakti hai
sathiyo thake-mande harte ho himmat kyuun
duur se koi manzil din men kab chamakti hai
kaam azm-o-himmat se insiram paate hain
kahili ki mat suniye kahili to bikti hai
jis ko nik.hat-o-gul se vasta nahin hota
ḳhush-libas phulon men vo nazar bahakti hai
‘shad’ in andheron men kahkashan ki manzil se
raat ke guzarne ki sub.h raah takti hai
Leave a Reply