aamir-suhail

Lahu Mein Rang-e-Sukhan Us Ka Bhar Ke Dekhte Hain

lahu men rang-e-sukhan us ka bhar ke dekhte hain

charagh baam se jis ko utar ke dekhte hain

mulaemat hai ghazal ki si us ki baton men

ye baat hai to chalo baat karke dekhte hain

sahifa-e-lab-o-rukhsar-o-pairahan us ka

tilavaton men hain patte shajar ke dekhte hain

bala ke naame hain do sipyai ankhon men

gurez-o-gardish-o-ghamze nazar ke dekhte hain

balaen lete hue husn-e-be-nihayat ki

tiri taraf tire ushshaq Dar ke dekhte hain

charaghte hain kisi nazm ke ghane abru

kisi ghazal ki judai men mar ke dekhte hain

thahar gaya ho na avaz-e-pa tiri sun kar

so dil pe raasha-zada haath dhar ke dekhte hain

karakhtagi hai na khud-raftagi na fahmaish

mizaj badle hue ham safar ke dekhte hain

ruke hue hain bahut log dekhne ke liye

so ham bhi shoabde us khvab-gar ke dekhte hain

bhari hai ranj ki barish se umr ki karez

ham ek kone men baithe hain ghir ke dekhte hain

ab uth bhi jaae koi khvab-gah-e-girya se

vo pau phati vo manare sahar ke dekhte hain

ye simyai badan khvab-e-nim-shab to nahin

so khal-o-khad ki tamazat ko Dar ke dekhte hain

ai tere sabza-e-rukhsar ki dil-avezi

navah-e-chashm se aansu guzar ke dekhte hain

kati hai umr ghazal-zad-gan ki sohbat men

unhi ke kuche men akhir bikhar ke dekhte hain

mashaqqati hain tire kakh-o-ku-e-hijr ke ham

sharab-e-hijr pyale men bhar ke dekhte hain

jhukae kandhon ko ushshaq pa-ba-gil ki tarah

niDhal pyaas se ham log thar ke dekhte hain

bala ka qaht hai sailab hai taattul hai

koi vatan hai manazir ghadar ke dekhte hain

ho izn sang-e-lahad ke tavaf ka ‘amir’

tuyur udte hue kashghar ke dekhte hain

chali hai tohmat-o-takzib ki hava ‘amir’

so shahr-e-khak-o-khabar men thahar ke dekhte hain

More Poems

Leave a Comment