Nirmal Nadeem
mira dard-e-dil hai ravan-davan mira zaḳhm-e-dil bhi gulab hai
miri ḳhushbuon si hai dastan ye jahan meri kitab hai
main qalam ka ek sipahi huun miri zehniyat men hai sha.iri
jahan fikr ki hai bulandiyan mira harf harf vo baab hai
kabhi mere dil men tu dekhna ki jahan tamam simaT ga.e
kare zikr jis ka har ik zaban mire dard ka vo shabab hai
tujhe saath kaise main le chalun main safar pe huun kisi tuur ke
tire saath chalti hain mastiyan tiri chaal mauj-e-chanab hai
mire bal-o-par men vo hausla hai jo asman ko sameT le
jo mujhe bana.ega javedan miri chashm-e-tar men vo ḳhvab hai
mujhe le ke chalna hai le ke chal par use bhi le le tu saath men
mujhe kar na pa.ega tu bayan main saval huun vo javab hai
main nashe men tere hi chuur huun tire paas ho ke bhi duur huun
tu mire vajud men hai nihan tira gham hi meri sharab hai
ye nujum-o-shams-o-qamar sabhi men jo raushni hai mujhi se hai
mira qarz-dar hai asman mire zaḳhmon hi ki vo taab hai
main ne sarf kar di hai zindagi tiri manzilon ki talash men
tujhe DhunDhta na phira kahan mire ishq ka tu sarab hai
Leave a Reply