Maqsood Wafa
zabt-e-girya men bhi girya to kiya hai main ne
chup raha huun pa tamasha to kiya hai main ne
ab uḌa.unga use tere falak par ik din
apni miTTi ko ikaTTha to kiya hai main ne
dekhiye kis ke ḳhad-o-ḳhal nazar aate hain
ek divar ko shisha to kiya hai main ne
ab main kuchh aur banun aisi bayabani men
TuuT jaane ka irada to kiya hai main ne
khul ke main vasl ki baten nahin karta phir bhi
baton baton men taqaza to kiya hai main ne
pyaar ki had hi nahin koi ye maana lekin
jitna ho sakta hai utna to kiya hai main ne
shayad aa jaa.e ḳhabar apne alava huun kahan
ḳhud ko tanha.i men tanha to kiya hai main ne
mujh men tashkik bhi sar apna uTha sakti hai
ai ḳhuda tujh pe bharosa to kiya hai main ne
jaane ab kaun gali men kahin niklun ja kar
ek virane men rasta to kiya hai main ne
vo kahin hai ki nahin hai mujhe ma.alum nahin
apne hone ka ishara to kiya hai main ne
ab faqat aḳhiri ishq aḳhiri maqsud-‘vafa’
aḳhiri ishq ki pahla to kiya hai main ne
Leave a Reply