Sardar Panchhi
sub.h kanTon pe shaam kanTon par
umr guzri tamam kanTon par
mire apne qalam ne chupke se
likh diya mera naam kanTon par
teri kirnen bhi raqs karti hain
roz mah-e-tamam kanTon par
rang aur bu-e-gul ke ashiq sab
kaun bheje salam kanTon par
roz shabnam se ghusl karte hain
hai gulon ka hamam kanTon par
ibtida-e-hayat phulon se
aur hai iḳhtitam kanTon par
aisi masti ki titliyan bhaunre
ho ga.e ham-kalam kanTon par
husn ki har ada gulon par hai
ishq ka ehtisham kanTon par
shaḳh-e-gul par qafas hai ‘panchhi’ ka
aur shirin ta.aam kanTon par
Leave a Reply